ہم سب برائے فروخت ہیں

Print Friendly, PDF & Email

میڈیا کے توسط سے بارہا یہ باور کرایا جاتا رہا ہے کہ ہم سب برائے فروخت ہیں یعنی سب کی قیمتیں لگتی ہیں اور جیسے بازار میں مختلف انواع و اقسام کی اشیاء فروخت کے لئے پیش ہوتی ہیں، بالکل اسی طرح سے ہم سب بھی برائے فروخت ہیں۔ اب ہمارے خریدار ہمیں خرید کر آگ لگا دیں یا پھر کسی بھی طرح سے ہماری بے عزتی کا سامان کریں ہم اس کی ملکیت جو ٹھہرے۔

بدعنوانی بھی دو طرفہ عمل ہے اگر ایک بدعنوانی کررہا ہے تو کسی کے ساتھ بدعنوانی ہو رہی ہے یعنی اس کے لئے یہ ضروری ہے کہ آپ اس مکمل زنجیر کو بے نقاب کریں جس کی کڑیاں مل کر کسی کو بدعنوان کہلانے تک کے عمل تک پہنچانے میں اپنا اپنا کردار ادا کرتے ہیں۔ بد عنوان افراد نہیں ہوتے بدعنوان معاشرہ ہوتا ہے۔ سڑک پر اگر ساری گاڑیاں اپنی اپنی رو میں رواں دواں رہیں تو بد انتظامی جسے حرف عام میں ٹریفک کا پھنسنا کہا جاتا ہے نہ ہو، جہاں کسی ایک گاڑی نے یا اس کے چلانے والے نے اپنی اہمیت جتانے کی کوشش کی وہیں سے سارا معاملہ خراب ہوتا چلا گیا (علاوہ ایمبیولینس کے)۔بدعنوانوں کو سادہ لوح لوگ بدعنوان بننے میں مدد فراہم کرتے ہیں۔ یہ کچھ ایسی حقیقتیں ہیں جس کی وجہ ہمارا نظام عدل ہے جہاں عام آدمی کی کوئی سنوائی نہیں ہوتی تو عام آدمی اس خوف سے کہ کہیں کوئی بڑا آدمی نہ ہو گاڑی کو راستہ دے ہی دیتا ہے اسی طرح بدعنوانوں کی تعداد میں اضافہ ہوتا چلا جاتاہے۔ ہم اپنا قیمتی ووٹ دیتے ہوئے اس بات کو خاطر میں ہی نہیں رکھتے کہ اگر یہ ووٹ غلط نشان کے ساتھ چلا گیا تو کسی کو بدعنوانی کا پروانہ مل جائے گا اور اس بدعنوانی کی اکائی ہمارا ووٹ ہوگا۔ آج نوبت یہاں تک پہنچ چکی ہے کہ اگر کسی چور کو چوری کرتے ہوئے دیکھ لیا جائے تو چور دیکھنے والے یا والوں کو ان کا منہ بند رکھنے کی قیمت دینے کو تیا ر ہوتا ہے اور شاید اکثریت ایسا کرنے پر مجبور ہوتی ہے وہ جانتے ہیں کہ اس کا تو کچھ بھی نہیں بگڑے گا الٹا مصیبت ہمارے ہی گلے پڑ جائے گی۔ اس لئے اپنی مرضی کی قیمت وصول کرتے ہیں اور اس چور کا حوصلہ بلند کرتے ہوئے چلے جاتے ہیں۔ گاہے بگاہے ہمارے سیاستدان جو کوئی بھی مخالفت کی نشستوں پر براجمان ہوتے ہیں بتاتے رہتے ہیں کہ پاکستان کا بچہ بچہ بلکہ پیدا ہونے والا بچہ بھی کتنی رقم کا مقروض ہے۔

یہ بھی پڑھئے:   عطائیت کو جڑ سے اکھاڑ پھینکنے کے حکومتی دعوے - انور عباس انور

بیچنے والے کے لئے یہ اہم نہیں ہوتا کہ خریدار کون ہے اس کے لئے یہ اہم ہوتا ہے کہ اس کے منہ مانگے دام جو کوئی بھی دے دے ، وہ اس بات سے بھی عاری ہوتا ہے کہ خریدار اپنی اس حیثیت کو ظاہر کر رہا ہے جس حیثیت کی وہ شے پر ہاتھ رکھ کر کھڑا ہوا ہے ۔ بظاہر تو نہیں مگر لگتا ایسا ہی کہ ہم لوگ اپنی اولادوں کو اچھی سے اچھی تعلیم اس لئے ہی دلوا رہے ہیں کہ زیادہ سے زیادہ میں فروخت کر سکیں۔ دھماکہ پاکستان کی مسجد میں ہو، امام بارگاہ میں ہو، مندر میں ہو یا پھر گرجا گھر میں ہو یہ سب پاکستانی ہیں۔ پاکستان کی اینٹوں سے بنے ہیں ان اینٹوں سے جن میں پاک سرزمین کی مٹی شامل ہے انہیں نام دے کر مختلف کیا گیا ہے جیسے یہ جگہیں ایک ہی خدا کی بڑائی ماننے کے لئے بنائی گئی ہیں۔ کیونکہ سرِ عام جو یہ بات کہنے سے خوف کھاتے ہیں کہ اللہ ایک ہے تو وہ چپکے سے ان مخصوص چار دیواریوں میں سرگوشیوں میں تھوڑی بہت شرمندگی سے سجدہ ریز ہوتے ہیں اور اپنے رب کی حقانیت کے سامنے سرتسلیم خم کرتے ہیں۔ یہ مضمون کسی مذہبی افہام و تفہیم کی مد میں نہیں لکھا جا رہا ہے ۔ اس میں تو پاکستانیت کے بنیادی تصور پر روشنی ڈالنے کی کوشش کی جارہی ہے۔ جیسا کہ حدیث سے ثابت ہے کہ ہر امت کا کوئی نا کوئی فتنہ ہوتا ہے تو ہمارے پیارے نبی ﷺ نے اپنی امت کا فتنہ مال اور اولاد کو قرار دیا اور بہت ہی وضاحت سے بتا دیا کہ اولاد کی محبت میں مال کے حلال اور حرام قید سے آزاد ہوتے جا رہے ہیں۔ معاشرے میں نفسانفسی کی وجوہات کی اگر فہرست مرتب کی جائے تو سرِفہرست مال کا حصول کیسے ممکن ہو لکھا جائے گا۔ ہم اپنی ضرورتیں بڑھاتے ہی جا رہے ہیں دشمن کے سازشی ذہن نے سمجھ لیا ہے کہ ہمیں کیسے ٹھکانے لگایا جاسکتا ہے۔ ڈاکٹر، انجینئر، میکینک ، ہسپتال والے ، ہوٹلوں والے غرض یہ کہ درس و تدریس سے وابستہ لوگ بھی اپنی اپنی بولیاں لگوا رہے ہیں، جہاں سے اچھی قیمت ملتی ہے وہاں کے ہوجاتے ہیں۔ ایسا تو ہمیشہ سے ہی ہوتا آیا ہے جس کی وجہ سے ایک مثال وجود میں آئی کہ گھوڑا گھاس سے یاری کرے گا تو کھائے گا کیا؟ لیکن پہلے وقتوں میں لوگ انمول ہوتے تھے اخلاقیات اور اقدار کے علمبردار ہوتے تھے شاید ان جیسے لوگوں کے لئے ہی شاعر نے جذبات کو لفظوں کی شکل میں شعر بناکر پیش کیا ہے کہ

یہ بھی پڑھئے:   جنید جمشید1964 سے 2016 تک - عقیل عباس جعفری

ہم خوشبو کے سوداگر ہیں سودا سچا کرتے ہیں
جو گاہک پھولوں جیساہو بن داموں بک جاتے ہیں

ہم سب آسائشوں کے دلدل میں پھنستے ہی چلے جا رہے ہیں اوران آسائشوں کے حصول کے لئے اپنے آپ تک کو گروی رکھنے سے گریز نہیں کر رہے۔ اب تک چھپ چھپا کے بدعنوان اپنی بدعنوانیوں سے معزز بنے چھپتے پھر رہے تھے مگر اب بدعنوانی کسی خاص ملک یا قوم کا نہیں بلکہ یہ امت کا مسئلہ بن کر سامنے آیا ہے۔ اس امت کی بدعنوانی کو ہماری سب سے بڑی کمزوری سمجھ کر امریکہ اور اسرائیل نے مل کر ایک انتہائی کاری اور سفاکانہ ضرب لگائی ہے جس سے ہر مسلمان جس کے دل میں ابھی رائی کے برابر بھی ایمان ہے تڑپ کر رہ گیا ہے تو دوسری طرف پاکستان کے لئے عالمی اداروں نے قرضوں کی فراہمی کو یقینی بنانے کا عندیہ دے دیا ہے۔ ہم موت کے آنے تک خود کو موت سے ماورا سمجھنے لگے ہیں۔ ہم سب نے اپنے آپ کو دنیا کی آسائشوں کے آگے برائے فروخت لکھ کر پیش کر دیا ہے اور ہم مسلسل فروخت ہو رہے ہیں۔ جی ہاں اس میں کوئی دو رائے نہیں ہو سکتیں کہ ہم سب ہی برائے فروخت ہیں۔

Views All Time
Views All Time
250
Views Today
Views Today
1

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

%d bloggers like this: