سیلفی ایک لا علاج مرض ہے

Print Friendly, PDF & Email

دُنیا ترقی کی مَنازل طے کرنے میں مصروف ہے اور ہم جَدید دور کی ایجاد کردہ ”سیلفی“ بڑے اِنہماک سے دوسروں کے ساتھ لینے میں مشغول ہیں۔ کیونکہ جہاں روز بروز ہمارا اپنا اِسٹیٹس گِرتا جا رہا ہے وہاں فیس بُک پر اِسٹیٹس اَپ ڈیٹ کر کے نہ جانے ہم کس خوش فہمی میں مُبتلا ہیں۔ گویا اگر فیس بُک پر اِسٹیٹس اَپ ڈیٹ ہوگیا تو، ہمارا شمار ایک باعزت ، اہل علم افراد میں ہونے لگ جاۓ گا۔

زندگی بہت خوب صورت ہے۔ ہم زندگی کے ہر گذرتے دِن کو یادگار بنانے کی کوشش کرتے ہیں اور اِن ہی لمحات کو تصویر کی شَکل میں محفوظ کر لیتے ہیں۔ اگر ماضی میں دیکھنا ہو تو تصاویر میں جھانک لیتے ہیں، تو ماضی کی گذری ہوئی یادیں تازہ ہو جاتی ہیں۔ پہلے کے دور میں بناٶ سِنگھار کر کے تصاویر لی جاتی تھیں مگر اب زمانہ بدل چکا ہے کیونکہ اب سیلفی کے لیے تیار ہوا جاتا ہے۔جب سیلفی مُتعارف نہیں کرائی گئی تھی، تو تصویر لینے والا تصویر میں نہیں آ سکتا تھا۔ لیکن سیلفی کے ذریعے نہ صرف تصویریں ہاتھ کے ہاتھ دیکھی جاسکتی ہیں، بلکہ تصویر لینے والا بھی با آسانی تصویر میں آسکتا ہے۔ کیمرے، اِسمارٹ فون سے اُتاری گئی تصاویر جِنھیں سَماجی روابط کی ویب سائٹس پر پوسٹ کیا جاۓ وہ سیلفی کہلاتی ہے۔

سیلفی کا بُخار اب سَرطان بن چکا ہے وہ بھی لا علاج! یہ سیلفیاں خود پَسندی کے جراثیم اِتنی تیزی کے ساتھ پھیل رہے ہیں کہ اب جراثیم بھی شرما گئے کیا ہم بُرے ہیں۔ مجھے تو اب تک ٹھیک سے سیلفی بنانا نہیں آتی کیونکہ میں ایک ”سیلف میڈ“ انسان ہوں۔ میرے والدین اِن جاں لیوا بیماریوں سے واقف تھے، تو مجھے بَچپن میں ہی حفاظتی ٹِیکے لگا دئیے تھے۔ اگر کوئی شخص اپنی بے تُکی سیلفی کے بجاۓ سادہ سیلفی کھینچ کر اپنے ہی سوشل مِیڈیا اکاونٹ پر پوسٹ کر دے، تو ایک خاص ”مہذب طبقے“ کے لوگ جِن کو حَسد کی بیماری چاٹ رہی ہے وہ اِس تصویر پر تَہمتوں کی برسات کر کے اپنی ہی آخرت تباہ کر دیتے ہیں۔

یہ بھی پڑھئے:   ہم پہلے عورت ہیں، پھر کچھ اور - سائرہ فاروق

سیلفی کا جو یہ بڑھتا ہوا رجحان معاشرے میں اَنا پَرستی کو فروغ دے رہا ہے۔ سیلفی بنانے کا خَبط مَردوں و  خواتین دونوں میں پایا جاتا ہے۔ مجھے تو اب تک یہ سمجھ نہیں آیا کہ آخر ہم اپنی بُھونڈی تخلیقات کے ذریعے معاشرے کی کون سی تصویر دُنیا کو دیکھانا چاہتے ہیں۔ اگر ٹوئیٹر پر عالمی ٹرینڈز دیکھیئے اور پھر پاکستانی ٹرینڈز دیکھیے۔ یَہود و نصارٰی جِن کو ہم اپنا دُشمن تصور کرتے ہیں وہ مَسائل اور ان کے حَل پر گفتگو کرتے ہوئے نظر آتے ہیں، بین المذاہب ہم آہنگی کو فروغ دے کر اِن پر اظہارِ خیال کرتے ہیں، ماحولیاتی مسائل کو کس طرح حل کرنا ہے اتفاق اور عدم اتفاق کے خوبصورت مظاہرے دیکھنے کو ملتے ہیں، اعتدال پسندی اور انتہا پسندی کے اِمتیاز کو واضح کرنے کی دِلکش بحثیں ہوتی ہیں، نسل پرستی، تہذیبی ، علاقائی تفاخر کے تصادم سے بچنے کے لیے تجاویز کا تبادلہ کرتے ہیں۔ لیکن ہمارے یہاں ”گو نواز گو“ ، ”رو عمران رو“ ، میں تو کہوں گا“ ، ”تِیر چلے گا، بَلا چلے گا“ اس جیسے بے تُکے ٹرینڈز چلتے ہیں۔

جہاں ہم دِل کھول کر دوسروں کے عُیوب کی دِلیرانہ نمائش کرتے ہیں، ساتھ ہی ساتھ ایک دوسرے کو ہاہاہا قہقہوں کے سبب آنسوں نکلتے ہوئے اِمُوٹِیکون بھی بھیج کر اپنی حسدانہ ، عدم تحفظ کا شکار شخصیت کا پوری دُنیا کو تعارف کراتے ہیں۔ یہ سب کر کے خُوب انداہ ہورہا ہے کہ ہم کس سِمت میں جارہے ہیں۔ نہ جانے ہم اپنی کونسی چھپی ہوئی جَبلت کو تسکین پہنچانے کا سامان کر رہے ہیں۔ حالانکہ ایسے بُلاگز پر بعض لوگ تنقید تو کرتے ہیں، لیکن میں اِس کو تاریخ کا حِصہ بنانا چاہتا ہوں۔ ہمیں احساس اِس وقت ہوگا جب ہماری اخلاقیات کا پَارہ انسانی اِقدار کے نقطہ اِنجماد سے گِر جائے گا۔

Views All Time
Views All Time
139
Views Today
Views Today
1

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

%d bloggers like this: