Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

ادھوری جنس کے جوان لاشے

Print Friendly, PDF & Email

‎احساسِ برہنگی تپتی ریت سے کہیں زیادہ گرم جھلستی آگ کو محسوس کرتا یہ میرا وجود ہے۔
‎میں مجرم کہ میرا جُرم یہ ہے کہ میں خواجہ سرا ہوں اور مجھے نو ستمبر کو ساہیوال میں زندہ جلا دیا گیا۔ گو اب میرے بدن پر زمین کا آب بھی اثر کھو رہا ہے، جس پر آسمانوں سے صدائیں دیتا صبر بھی بجلی بن کر ٹوٹ رہا ہے۔ ‎قہرو نفرت کی آگ میں جھونک ڈالنے والے نے ایک بار نہ سوچا کہ خدا کے کُن میں ایک فیصلہ ہمارا وجود، ہماری ولادت بھی تھا!! ‎پھر اتنی نفرت کیوں جو صدیوں پر محیط ہے۔ دل ہی دل میں تشنگی کی طویل سسکیاں لیتے ہم سوچتے ہیں کہ دُنیاوی و مذہبی تخیل کی دنیا میں مکمل جواب ہوتے ہوئے بھی آج تک ہم انسانیت کی بستی میں سوالیہ نشان کیوں بنے ہوئے ہیں؟

‎کوئی نور تو ایسا لاؤ جس کی روشنی سے تمھاری آنکھیں چندھیا جائیں
‎کوئی عصا اس دھرتی پر بھی مارو جو انسانیت کے راستے ہموار کرے
‎کوئی تو تم جیسے احساس سے منکر ہجوم کو صراطِ مستقیم پر لانے کا اعلان کرے
،کوئی تو صَفا کے مینار سے آبِ حیات کے چشمے کو ہم پر حلال کرے
‎ہم تمھارے مردانہ طوفان کے آثاروں سے نظریں چرا کر مقدر سے لڑنے کے سراب خواب دیکھ رہے ہیں
‎ہم آدھی جنس والے اپنے پاؤں پہ لڑکھڑاتے چلنا سیکھ رہے ہیں، دوڑنے کی آرزو نہیں کی کیوں کہ تم خدا پرستوں نے چلنا بھی محال کر دیا۔ ‎تمھاری مذہبی تلواریں سانسوں کی ڈور کاٹ ڈالتی ہیں تو کبھی تمھارے معیار کی چوٹیوں سے ہمیں دھکیل دیا جاتا ہے۔ کبھی ہماری جنس ہی تمھاری حیوانوں جیسی جنسی بھوک مٹانے کا بس ایک وقتی ذریعہ رہتی ہے تو کبھی ہم پر سب ہی ستم جائز قرار دینے کے باوجود زمین کے بعد قبرستان کی زمین بھی تنگ کردی جاتی ہے۔‎جینے کا حق چھیننے کے بعد خاموشی سے ہمیں دفن کرنے کی داستانیں گھڑی جاتی ہیں۔

یہ بھی پڑھئے:   قائد عوام ذوالفقار علی بھٹو - اختر سردار چودھری

ہماری چیخ ۔ ۔ ۔ خاموش چیخ ہے۔ ہمارے جوان لاشے ماتم کر رہے ہیں مگر تم اشرف المخلوقات کو سنائی نہ دیں گے۔ ‎ہماری وحشتیں جب موت بن جاتی ہیں تو کیمرے کی آنکھ ہمیں شرمندہ شرمندہ آنکھوں سے دیکھنے کی جسارت کرتی ہے۔ مگر تم ستم ظریف ہم پر ہونے والے ظلم و ستم کے مناظر کو کیمرے کی آنکھ میں محفوظ کر کے بھی حقیقت کے وہ مناظر نظرانداز کر دیتے ہو جو وقتی شور برپا کرنے والوں سے کہہ جاتے ہیں کہ یہ فحاشی کا ایک مینار ہیں جسے گرا دینے میں ہی سماج کی فلاح و بہبود ہے۔ اِنہی اونچے میناروں کے لاؤڈ اسپیکر پر ہماری جنس کو نشانہ بنا کر قومِ لوط کی بےحیائی سے موازنہ کر کے الزام دھرے جاتے ہیں لیکن اسی اسپیکر پر دن میں پانچ بار فلاح پکارے جانے والا بھی ہمیں فلاح کا کوئی راستہ فراہم کرنے کو ہرگز تیار دکھائی نہیں دیتا۔

اگر دینی گروہوں نے کوئی راہ چھوڑی ہوتی تو میری ماں سماج سے کچھ تو مقابلہ کرنے کی ٹھان لیتی۔ ‎ماں جب تمھاری شرمندگی دیکھ کر میں نے کہا ہاتھ چھوڑ دو تو تم نے بھی وقت کے ساتھ مل کر کمال ہی کر دیا۔ مگر کیسے میرے صرف ایک بار کہنے سے تم نے فوری معاشرے کی غلیظ سوچ سے شکست تسلیم کر لی؟ ‎تم میری پرورش سے مجھے مرد نہیں بنا سکتی تھیں مگر ایک مکمل انسان تو بنا سکتی تھیں ناں؟

‎جب بابا نے مجھے لہروں کی امانت بنانا چاہا تو مجھے یقین تھا کہ وہ اتنی آسانی سے جذبات کا لہو بہا کر اپنے کاندھوں پر ناحق خون کا قرض نہیں لیں گے۔ کیوں کہ ہمارے نصیب میں سسکتی بلکتی ہجر کی قید کی ماری زندگی لکھ دی جاتی ہے، ‎تمہیں بھی نہیں معلوم تھا ناں بابا کہ تمھارا وحشت کا پانی زندگی بھر کےلیے ناسور بن جائے گا؟ کاش بابا تم آزاد کرنے کی بجائے مجھے مار ہی دیتے۔ میرے اندر کی قیدِ تنہائی مجھے روز موت سے ہمکلام ہونے کی نوید سناتی رہے گی۔ تم مجھے اس ادا سے ڈبو کر چل دیے جیسے پھول خوشبو سے ملن کے بعد بچھڑ کر بکھر گئے ہوں۔

یہ بھی پڑھئے:   شدید گرمی میں گیسٹرو سے احتیاط

‎ہماری نومولود زندگی کی دھنک کے رنگ چار عالم میں قدم رکھنے کی آرزو کرنے کی جسارت بھی نہیں کرنا چاھتے مگر ہم پھر بھی روز پیدا اور روز مرتے ہیں۔ ‎بابا لوگوں کی طرح تشنگی نے تمھارے بھی حواس خدا پرستی کے نشے میں اس قدر گم کر دیے کہ آسمان کے فیصلوں سے بھی منکر ہوگئے۔ ہاں وہی آسمان
‎وہی آپ کا عقیدہ جس کے کُن کی اجازت کے بغیر ایک پتا بھی نہیں ہلتا!
‎مگر سنو بابا!!!
‎تم اپنے ہی خدا کی مرضی سے جھگڑ سکتے ہو مگر میرا خدا بہت بڑا ہے۔ وہ تمھاری طرح چھوٹا، کم ظرف نہیں ۔ ۔ ۔ جو اپنی مجبوریوں، محرومیوں اور کمزوریوں کو مقدر کا لکھا مان کر ۔ ۔ ۔ اپنی بنائی ہوئی چیزیں توڑ کر ۔ ۔ ۔ایک بچے کی طرح خوش ہوتا ہو۔

Views All Time
Views All Time
1118
Views Today
Views Today
2

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

%d bloggers like this: